குரூப்-1 முதன்மை தேர்வு அடுத்த மாதத்திற்கு ஒத்தி வைப்பு

குரூப் 1 முதன்மைத் தேர்வு அடுத்த மாதம் நடத்தப்படும் என்று டிஎன்பிஎஸ்சி அறிவிப்பு வெளியிட்டுள்ளது. இது குறித்து தமிழ்நாடு அரசுப் பணியாளர் தேர்வாணையம் வியாழக்கிழமை வெளியிட்ட அறிவிப்பு: தமிழ்நாடு அரசுப் பணியாளர் தேர்வாணையத்தின் மூலம் குரூப் 1 பதவிகளுக்கான முதன்மை எழுத்துத் தேர்வு வரும் 27-ஆம் தேதி தொடங்கி 29-ஆம் தேதி வரை நடைபெறும் என்று அறிவிக்கப்பட்டிருந்தது. இந்த தினங்களில் பிற போட்டித் தேர்வுகள் நடைபெறுவதால், குரூப் 1 முதன்மைத் தேர்வு அடுத்த மாதம் (அக்டோபர்) 25-ஆம் தேதி முதல் 27-ஆம் தேதி வரை நடைபெறும். மேலும், இந்து சமய அறநிலையத் துறையின் செயல் அலுவலர் நிலை-4க்கான தேர்வு அடுத்த மாதம் (அக்டோபர்) 26 ஆம் தேதி நடைபெறுவதாக அறிவிக்கப்பட்டிருந்தது. இந்தத் தேர்வு நவம்பர் 16 ஆம் தேதிக்கு ஒத்தி வைக்கப்பட்டுள்ளதாக டி.என்.பி.எஸ்.சி. அறிவித்துள்ளது.